21 July 2010 - Patuloy ang Konsulado Heneral ng Pilipinas sa Macau sa pagsasagawa ng mga hakbang para maiwasan na maging biktima ng mga illegal recruitment ang mga Pilipino dito sa Macau.
Sa isang kaso noong nakaraang linggo, isang recruiter na taga-Region 5 ang naghikayat ng 10 katao, na halos lahat ay college graduate, na pumunta sa Macau at pinangakuan ng trabaho. Subalit matapos magbigay ng malaking halaga, ang mga biktima ay sinamahan at nanatili sa San Ma Lou, Macau ng halos dalawang buwan sa kahihintay, ngunit wala namang nakuhang ipinangakong job placement.Napauwi sa Pilipinas ng Konsulado Heneral ang mga biktima noong gabi ng Hulyo 9 matapos mapilit na sagutin ng recruiter ang mga return airline tickets ng mga biktima at mabayaran ng paunang halaga ang mga kaanak sa Pilipinas sa nakuhang kabayaran ng recruitment fees.
Dumulog sa Konsulado Heneral ang mga biktima, kung kaya't agad nakipag-ugnayan ang kinatawan ng Konsulado sa pulis, immigration, at judiciary ng Macau kasama ang mga biktima at suspek para maimbestigahan ang reklamo o kaso at nagkaroon ng mabilisang pagdinig.
Liban sa suspek, pansamantalang nakulong din nang ilang oras ang mga biktima, dahil hindi nila pinalalabas ng bahay ang suspek hanggang hindi nito matupad ang ipinangako sa kanila na naging sanhi ng pagtawag ng huli sa mga pulis na siya ay na-hostage.
Namagitan ang Konsulado Heneral upang madaliang mapakawalan, mailigtas ang mga biktima at makauwi sa Pilipinas sa lalong madaling panahon.
Naimbestigahan ng Konsulado at nakuhang lahat ang mga salaysay ng mga biktima para maipagpatuloy ang imbestigasyon ng kaso, sa pakikipag-ugnayan sa mga biktima.
Samantala, patuloy rin naman ang pakikipag-ugnayan ng Konsulado sa mga contacts ng recruiters dito sa Macau, para patuloy na maimbestigahan ang modus operandi at matigilan ang iba pang magiging biktima.
